2026 жылғы 11 ақпанда Аккредиттеу және рейтинг тәуелсіз агенттігі (АРТА/IAAR) Тәжікстан Республикасы Президенті жанындағы Жоғары аттестациялық комиссиясымен (ЖАК) бірлесіп Душанбе қаласында «Цифрландыру және жаһандану жағдайындағы ғылымның даму үрдістері» тақырыбында халықаралық семинар өткізді. Семинар Тәжікстанның жетекші жоғары оқу орны – Тәжік ұлттық университеті базасында ұйымдастырылды.

Құттықтау сөзбен Тәжікстан Республикасы Президенті жанындағы ЖАК төрағасы, биология ғылымдарының докторы, профессор, Тәжікстан Ұлттық ғылым академиясының корреспондент-мүшесі Давлатзода Сайфиддин Хайриддин, сондай-ақ Тәжікстан Республикасының Білім және ғылым министрлігі мен Ұлттық ғылым академиясының өкілдері сөз сөйледі.

Аккредиттеу және рейтинг тәуелсіз агенттігінің Бас директоры, заң ғылымдарының кандидаты Алина Бақытжановна Жұмағұлова «Білім сапасын арттыру: трендтер және жаңа көкжиектер» тақырыбында баяндама жасап, IAAR халықаралық аккредиттеу тәжірибесімен бөлісті. Ал экономика ғылымдарының докторы, профессор, АРТА/IAAR кеңесшісі Ольга Алексеевна Яновская халықаралық стандарттардың ғылыми-білім беру ортасының сапасын қамтамасыз етуге ықпалы туралы баяндады.

Халықаралық семинарға 350-ден астам адам қатысты. Олардың қатарында Тәжікстан Республикасы Президенті жанындағы Жоғары аттестациялық комиссияның, Тәжікстан Республикасының Білім және ғылым министрлігінің, Экономикалық даму және сауда министрлігінің, Мәдениет министрлігінің, Президент жанындағы Білім және ғылым саласын қадағалау агенттігінің, Тәжікстан Ұлттық ғылым академиясының өкілдері, салалық академиялар, жоғары оқу орындарының ректорлары мен проректорлары, ғылыми-зерттеу институттарының басшылары және академиялық қауымдастық өкілдері болды.

Семинар қорытындысы бойынша барлық қатысушыларға халықаралық сертификаттар табысталды.