БІЛІМ БЕРУ САПАСЫН ҚАМТАМАСЫЗ ЕТУ БОЙЫНША VII ОРТАЛЫҚ АЗИЯ ХАЛЫҚАРАЛЫҚ ФОРУМ

2023 жылдың 6-7 қазанда Аккредиттеу және рейтингтің тәуелсіз агенттігінің ұйымдастыруымен «Білім сапасын қамтамасыз ету бойынша VII Орталық Азия халықаралық форумы: «Білім берудің тұрақты болашағы – сапа және бәсекеге қабілеттілік: шындықтар мен басымдықтар» өтті. ( Астана қ., Оқушылар сарайы).

Жыл сайынғы Халықаралық форумның негізгі мақсаты – цифрлық трансформация және жаһандық өзгерістер жағдайында білім беру саласындағы озық тәжірибені талқылау және алмасу үшін халықаралық диалог алаңын құру.

Халықаралық форумға 300-ден астам адам қатысты. Оның ішінде мемлекеттік органдардың, жоғары білім сапасын қамтамасыз ету бойынша халықаралық желілердің өкілдері, Қазақстан, Ресей, Түркия, Әзірбайжан, Қырғызстан, Өзбекстан, Тәжікстан, Молдова және т.б. жоғары оқу орындарының басшылары қатысты.

Халықаралық форумның пленарлық отырысын Аккредиттеу және рейтингтің тәуелсіз агенттігінің бас директоры Жұмағұлова Алина Бақытжанқызы ашып, білім сапасын арттырудың негізгі басымдықтары туралы айтып, Орталық Азия және Еуропа елдеріндегі аккредиттеу тәжірибесімен бөлісті.

Қазақстан Республикасы Ғылым және жоғары білім вице-министрі Дархан Ахмед-Заки құттықтау сөз сөйледі.

Жоғары білім беру сапасын қамтамасыз етудің Еуропалық тізілімінің (EQAR) президенті Стефан Ловик Халықаралық форумға қатысып, білім беруді трансформациялаудағы заманауи үрдістер және әлемдік білім беру қауымдастығы алдында тұрған міндеттер туралы баяндама жасады.

Халықаралық форум аясында «Білім беру жүйесін дамытудың жаһандық сын-қатерлері мен тенденциялары», «Цифрлық трансформация жағдайындағы ғылыми және білім беру үлгілері мен технологияларын дамыту» және «Медициналық білім сапасын қамтамасыз ету» панельдік сессияларында» келесі негізгі мәселелер талқыланды:

- жаһандық өзгерістер жағдайында жоғары білім сапасын және тәуелсіз аккредиттеуді қамтамасыз ету жүйесін әзірлеу;

- сапа мәдениетін және кәсіби қоғамдастықты қалыптастыруды насихаттайтын халықаралық желілермен, агенттіктермен, университеттермен ынтымақтастықты кеңейту;

- халықаралық стандарттарға және академиялық қоғамдастық пен халықаралық еңбек нарығының конструктивті өзара әрекеттестігіне сәйкес студенттерге білім берудің, білім беру бағдарламаларының және оқыту траекториясының сапасын арттыру.